په لوګر کې د افغانستان ا.ا "مجاهدینو" لپاره د لنډ مهاله روزنیز دورې په لاره اچول
د لوګر ولایت تخنیکي او مسلکي زده کړو ادارې د هغو «مجاهدینو» د ظرفیت لوړولو په موخه چې په دولتي ادارو کې د مامورینو په توګه ګمارل شوي دي، لنډ مهاله روزنیزه دوره جوړه کړه.
په دې دوره کې د کمپیوټر او ادارې مهارتونه تدریس کیږي.
د تخنيکي او مسلکي زده کړو امر حبيب الله حبيبي د دغه روزنيزې دورې له درسي ټولګيو څخه ليدنه وکړه. نوموړي د دغه کورس ترسره کول د افغانستان ا.ا «مجاهدینو» لپاره یو مهم فرصت وباله.
په نورو ولایتونو کې د تخنیکي او مسلکي زده کړو امریتونو هم د نویو ګمارل شویو کارکوونکو او "مجاهدینو" لپاره د ظرفیت لوړونې کورسونه جوړ کړي دي. تر دې دمه لسګونه کسان له دغو دورو فارغ شوي دي.
د تخنیکي او مسلکي زده کړو اداره هڅه کوي چې دغه پروګرام په ټولو ولایتونو کې پراخ کړي.
