د اسلامي امارت لوړپوړو د تخنیکي او مسلکي زده کړو ادارې د نوښت په مرکز کې له جوړ شوي موټر څخه لیدنه وکړه
د افغانستان د اسلامي امارت لوړپوړو د تخنیکي او مسلکي زده کړو ادارې د نوښت په مرکز کې له جوړ شوي موټر څخه لیدنه وکړه.
یاد موټر په باغ بابر کې د ملي ټلویزیون له خوا په جوړ شوي پروګرام کې نندارې ته وړاندې شو.
د اطلاعاتو او فرهنګ وزارت سرپرست ملا خیرالله خیرخواه، د اقتصاد وزارت سرپرست قاري دین محمد حنیف او د اسلامي امارت ویاند ذبیح الله مجاهد له دغه موټر څخه لیدنه وکړه او جوړونکي یې تشویق کړل.
د تخنيکي او مسلکي زده کړو ادارې سرپرست مولوي غلام حيدر شهامت د هغه څه په اړه خبرې وکړې چې د دې ادارې د نوښت په مرکز کې جوړ شوي وو.
د اقتصاد وزارت سرپرست د موټر جوړونکو د ډلې د مشر انجنیر رضا احمدي له کړنو څخه ستاینه وکړه او ویې ویل، "د موټر جوړول د هېواد د ځوان نوښتګر انجنیر محمد رضا احمدي نوښت دی، خو دا زموږ د ټول ملت ویاړ دی."
د اسلامي امارت ویاند ذبیح الله مجاهد د تخنیکي او مسلکي زده کړو ادارې له مشرتابه څخه مننه وکړه چې د ځوانو نوښتګرو د ملاتړ په موخه یې د دې ادارې له خوا د نوښت مرکز جوړ کړی دی.
د اسلامي امارت لوړپوړو هم انجینر رضا احمدي ته ستاینلیکونه او سوغاتونه ورکړل.
