په کابل کې ناشنوایانو لپاره لنډ مهاله حرفوي کورس په لاره اچول شوی
په کابل کې د ناشنوایانو لپاره په ناشنوایانو مسلکي انسټیټوټ کې دری میاشتنی حرفوي کورس په لاره اچول شوی دی.
په دغه برنامه کې ۳۱ ناشنوا زده کوونکو ته د ناشنوا ښوونکو له خوا د خیاطۍ زده کړه ورکول کېږي.
د تخنيکي او مسلکي زده کړو ادارې د حرفوي برنامو د سمون رئیس عبدالودود هوتک وويل، چې دغه اداره ناشنوایانو او نابینایانو کسانو ته ځانګړې پاملرنه کوي.
نوموړي د لنډ مهاله حرفوي کورسونو پر اغېزمنتيا د ټينګار ترڅنګ وويل، چې تخنيکي او مسلکي زده کړو اداره به په نورو څانګو کې هم د ناشنویانو او نابینایانو لپاره لنډ مهاله کورسونه جوړ کړي.
ښاغلي هوتک له ناشنویانو او نابینایانو زده کوونکو وغوښتل چې د حرفې په زده کولو کې هڅې وکړي.
