د کابل د روشندلانو تخنیکي او مسلکي زده کړو انسټيټوټ آمر څخه تقدیر وشو
د کابل ولایت د روشندلانو د تخنیکي او مسلکي زده کړو انسټيټوټ آمر محترم نورمحمد فیضي د یو لړ مراسمو په ترڅ کې د تخنیکي او مسلکي زده کړو ادارې د رئیس ښاغلي الحاج مولوي غلام حیدر شهامت له خوا وستایل شو.
محترم مولوي شهامت د روشندلانو انسټيټوټ د آمر د ستاینې په مراسمو کې د وینا پر مهال وویل، د اسلامي نظام مسوولین لوی خدای(ج) او ولس ته ځواب ورکوونکي دي،له همدې امله باید خپل کاري مسؤلیتونه په سمه توګه ترسره کړي.
نوموړي همدارنګه زیاته کړه چې د روشندلانو په انسټيټوټ کې د ښاغلي فیضي خدمات او هڅې د ستایلو وړ دي.
په ورته وخت کې د کابل د روشندلانو انسټيټوټ استادانو او مسوولینو د تخنیکي او مسلکي زده کړو ادارې له رئیس څخه د نوموړي د خدماتو او د لیدلو او اورېدلو معلولیت لرونکو وګړو ته د لا زیاتې پاملرنې له امله مننه وکړه.
دا په داسې حال کې ده چې د تخنيکي او مسلکي زده کړو اداره د اورېدلو او ليدلو د معلوليت لرونکو کسانو لپاره په ځانګړو ښوونيزو مرکزونو کې ټول لازمې امکانات او اسانتياوې برابرې کړي دي.
