د میدان وردګو ولایت په تنګي دره کې یو باب کثیرالرشتوي انسټیټوټ پرانیستل شو
الحاج مولوي غلام حیدر شهامت میدان وردګو ولایت ته د یوه سفر په ترڅ کې د دغه ولایت په تنګي دره کې یو باب کثیرالرشتوي انسټيټوټ پرانیست.
دغه راز په یاد سفر کې د انرژۍ او اوبو وزارت د معين مجيب الرحمن عمر اخندزاده په ګډون يو شمېر دولتي چارواکو هم د تخنيکي او مسلکي زده کړو له سرپرست سره شتون درلود.
محترم مولوي شهامت د دغه ښوونیز مرکز د پرانیستلو پرمهال وویل، د تنګي دره د اتلانو او غازیانو ځای دی او د دې جغرافیې خلک د ډیرو خدمتونو مستحق دي.
الحاج مولوي شهامت زیاته کړه، چې د میدان وردګو په تنګي دره کې د کثیرالرشتوي انسټيټوټ د جوړولو پرېکړه د یادې درې د ولسونو د سرښندنو او قربانیو په پایله کې شوې ده.
نوموړي د تخنيکي او مسلکي زده کړو ادارې د موخو په اړه هم توضیحات ورکړل او زياته يې کړه، چې نوموړې اداره د کار بازار او خصوصي سکټور د سفارشاتو او اړتياوو پر بنسټ مسلکي او متخصص وګړي روزي.
د تخنيکي او مسلکي زده کړو سرپرست د دې ادارې د مجاهدينو روزنيز پروګرام ته په اشارې سره وويل چې د هغې طرحې پر بنسټ چې د یادې ادارې له خوا چمتو شوې او د عملي کېدو په حال کې ده؛ په یادې طرحه کې په زرګونو مجاهدينو ته د عصري زده کړو زمينه برابره شوې.
له بلې خوا د سیمې ویناوالو او مشرانو د میدان وردګو د تنګي درې ته، د تخنیکي او مسلکي زده کړو د سرپرست له حضور څخه د مننې او قدردانۍ ترڅنګ، له حکومت څخه دغې درې ته د لا زیاتې پاملرنې غوښتنه وکړه.
د یاد کثیرالرشتوي انسټيټوټ د پرانیستغونډې پر مهال د سيمې مشرانو د وینا په ترڅ کې زياته کړه، چې پخوا به د شهيدانو د ښخولو لپاره راټولېدل او اوس د ډېرې خوښۍ ځاى دى، چې د عصري علومو د زده کړې د يو مهم مرکز د جوړولو لپاره راټول شوي دي.
