د میدان وردګو ولایت نرخ کثیرالرشتوي انسټیټوټ محصلینو ته قطرهای اوبو لګولو میتود معرفي شو
د میدان وردګو ولایت اړوند نرخ ولسوالۍ کثیرالرشتوي انسټیټوټ د کرنې څانګې محصلینو ته د عملي زده کړو په چهارچوب کې په یاد ولایت کې د ډاکټر عبدالوکیل کرنییز فارم ته د علمي سفر په ترڅ کې د قطرهای اوبو لګولو په اړه روزه ورکړل شوه.
د دې علمي سفر په ترڅ کې، لارښود استادمحصلینو ته د قطرهای اوبو لګولو اهمیت او ارزښت په اړه مفصل توضیحات وړاندې کړل.
نوموړي د دې ډول اوبو لګولو اهمیت ته په اشارې سره، محصلینو ته وویل چې؛ د قطرهای اوبه لګولو میتود یو مدرن او مؤثر میتود دی چې په کې اوبه په مستقیم ډول او په کم مقدار سره د پایپونو او څاڅکو له لارې د نباتاتو ریښو ته رسول کیږي.
دغه راز د درس په دوام کې، محصلینو هم په دې برخه کې خپلې پوښتنې او سوالونه له لارښود استاد سره شریکې کړې چې د هغوی پوښتنو ته د استاد له لوري جامع ځوابونه هم ورکړل شول.
د تخنیکي او مسلکي زده کړو په مرکزونو کې د زده کړو لویه برخه عملي ده، له همدې امله د تخنیکي او مسلکي زده کړو مرکزونو فارغان د فراغت وروسته په مستقیم ډول د کار بازار ته جذب کیږي.
