د تخنیکي او مسلکي زده کړو شمال ختیځ زون ریاست او یونما دفتر ترمنځ دوه اړخیزه غونډه ترسره شوه
د تخنیکي او مسلکي زده کړو ادارې د شمال ختیځ زون ریاست په کندز ولایت کې د یوې غونډې په ترڅ کې د یونما دفتر له ولایتي مسؤلینو سره وکتل.
یاده غونډه د ګډو همکاریو د پراختیا او د شمال ختیځ زون د تخنیکي او مسلکي زده کړو په مرکزونو کې د تدریسي او حرفوي پروګرامونو د کیفیت لوړولو لپاره ترسره شوه.
په دې غونډه کې د شمال ختیځو ولایتونو د تخنیکي او مسلکي زده کړو په مرکزونو کې د حرفوي او مسلکي برخو د ننګونو او اړتیاوو د ارزونې په اړه هم بحث وشو.
د غونډې په دوام کې، په کندز کې د یونما دفتر استازي د تخنیکي او مسلکي زده کړو ادارې له هڅو او فعالیتونو څخه ستاینه وکړه، او د اقتصادي ودې او ځوانانو ته د اشتغالزايي په برخه کې یې د مسلکي زده کړو د پیاوړتیا پر ارزښت ټینګار وکړ.
دغه راز نوموړي د تخنیکي او مسلکي زده کړو له ادارې سره د هر اړخیزو همکاریو ډاډ هم ورکړ.
