د تخنیکي او مسلکي زده کړو ادارې لخوا د همکارۍ دوه تفاهم لیکونه لاسلیک شول
ښاغلي الحاج مولوي غلام حیدر شهامت د افغان پراختیایي مؤسسې او راه نوین ټولنیزې مؤسسې له مسؤلینو سره د یوې ناستې په ترڅ کې د ګډو همکاریو تفاهم لیکونه لاسلیک کړل.
د دې تفاهم لیک پر بنسټ، دغه بنسټونه به د تخنیکي او مسلکي زده کړو له ادارې سره په همکارۍ سره د تخار، کندز او ارزګان ولایتونو کې لنډمهاله حرفوي روزنیز پروګرامونه پیل کړي.
د تخنیکي او مسلکي زده کړو ادارې سرپرست له نوموړو څخه د هرکلی ترڅنګ له هغوی وغوښتل چې د تخنیکي او مسلکي زده کړو له ادارې سره د حرفوي زده کړو په برخه کې لا زیاتې همکارۍ وکړي.
د حرفوي برنامو زده کړې د تخنیکي او مسلکي زده کړو ادارې له مهمو پروګرامونو څخه ګڼل کېږي، چې تر اوس مهاله زرګونه کسان له دې پروګرامونو څخه فارغ شوي او د کار په بازار کې پر دندو بوخت دي.
