د تخنيکي او مسلکي چارو مرستيال د ننګرهار له سيمه ييزو مسئولينو سره وکتل
د ولایتي سفرونو په دوام کې د تخنیکي او مسلکي چارو مرستیال مولوي غلام سعید احساس د یوه پلاوي په مشرۍ ننګرهار ولایت ته سفر وکړ.
ښاغلي احساس ننګرهار ولایت ته د خپل سفر پر مهال له مرستیال والي مولوي سعید احمد بنوري او د یاد ولایت د علماوو شورا له رئیس شیخ حضرت جان حنفي سره وکتل او خبرې اترې ورسره وکړې.
په دغې کتنه کې د هېواد په اقتصادي وده کې د تخنیکي او مسلکي زده کړو پر ارزښت خبرې وشوې.
مولوي احساس لومړی د تخنيکي او مسلکي زده کړو ادارې په اړه معلومات ورکړل او زياته يې کړه، چې د کار بازار لپاره د ماهر او مسلکي ځواک روزل د دغې ادارې له مهمو موخو څخه دي.
د تخنيکي او مسلکي زده کړو مرستيال د دغې ادارې له خوا د مجاهدينو لپاره د تدوین شوې روزنيزې طرحې په اړه هم معلومات ورکړل او ويې ويل، چې د یادې طرحې په پلي کېدو سره به د مجاهدينو لپاره به د زده کړو زمينه برابره شي.
ښاغلي احساس هغه سپورټي موټر ته هم اشاره وکړه چې د قطر نندارتون ته وړل شوی دی او زیاته یې کړه چې دغه موټر د تخنيکي او مسلکي زده کړو ادارې د نوښت په مرکز کې جوړ شوی دی.
نوموړي وويل، د تخنيکي او مسلکي زده کړو په اداره کې د نوښت مرکز له جوړېدو څخه موخه د نوښتګرو او د خلاقو ځوانانو د کډوالۍ مخنیوي په توګه یاد کړ.
دغه راز د ننګرهار مرستيال والي او د دغه ولايت د علماوو شورا رئيس د تخنيکي او مسلکي زده کړو ادارې د برنامو او لاسته راوړنو ستاينه وکړه او له دغې ادارې سره يې د لا زياتو مرستو ډاډ ورکړ.
له بل پلو دغه پلاوي د ننګرهار ولایت د تخنیکي او مسلکي زده کړو له مرکزونو څخه هم لیدنه وکړه او د دغو مرکزونو ستونزې یې وڅېړلې.
د تخنیکي او مسلکي زده کړو ادارې تر دې وړاندې هم یو شمېر ولایتونو ته سفرونه کړي او په پام کې ده چې د نوموړي پلاوي سفرونه د افغانستان ټولو ولایتونو ته وغځول شي.
