د بادغیس ادارې او حسابدارۍ انسټیټوټ اتمې دورې فراغت مراسم ترسره شول
د بادغیس ادارې او حسابدارۍ انسټیټوټ زده کړیالانو د اتمې دورې فراغت مراسم ترسره شول.
په دې مراسمو کې د ادارې او مدیریت، ادارې او تجارت او د استاد_شاګردی له څانګو څخه ۵۴ تنو د فراغت سندونه ترلاسه کړل.
د بادغیس ولایت تخنیکي او مسلکي زده کړو امر مولوي محمد عوض غیرت زده کړیالانو ته د فراغت په مناسبت مبارکي وویله او له دولتي ادارو او موسساتو څخه یې وغوښتل چې د ادارې او حسابدارۍ انسټیټوټ فارغانو د کار په بازار کې د جذب په برخه کې همکاري وکړي.
د ادارې او حسادارۍ انسټیټوټ امر علاءالدين عبيدي هيله څرګنده کړه، چې د دغه انسټیټوټ فارغان به ټولنې ته د خدمت جوګه شي.
د تخنیکي او مسلکي زده کړو امریت د تعلیمي څارنې او راپور ورکولو عمومي مدیر جمعه خان رحیمي د زده کړیالانو فراغت په مراسمو کې وویل چې دغه امریت د ټولنې له اړتیاوو سره سم د باکیفیته ښوونیزو خدمتونو وړاندې کولو ته ژمن دی.
