د مهارت او مسلک څخه د ملاتړ په پار تعقیبي او پیاوړتیايي کنفرانس ترسره شو
د تخنیکي او مسلکي زدهکړو ادارې د پلان او ستراتېژیکې همغږۍ ریاست د مهارت او مسلک څخه د ملاتړ تعقیبي او پیاوړتیايي کنفرانس جوړ کړ.
دغه کنفرانس چې د تخنیکي او مسلکي زدهکړو ادارې په مرکزي تالار کې ترسره شو، په کې بېلابېلو کورنیو او نړیوالو مؤسسو او بنسټونو ګډون کړی و. همداراز د ولایتونو تخنیکي آمریتونه هم په انلاین بڼه له دې کنفرانس سره یوځای شوي وو.
یاد کنفرانس د ډونرانو د جذب او د هغوی لخوا د تخنیکي او مسلکي زدهکړو ادارې سره د همکاریو د پیاوړتیا په موخه جوړ شوی و.
د پلان او ستراتېژیکې همغږۍ ریاست د تخنیکي او مسلکي زدهکړو ادارې د ستراتېژیک پلان بېلابېلې برخې او جزیات ګډونوالو ته تشریح کړل. د یاد ستراتېژیک پلان له مهمو مواردو څخه یو هم د بنسټونو او خصوصي سکتور د همکاریو څرنګوالی دی، چې د ریاست لخوا د پرېزنټېشن له لارې وړاندې شو.
تر دې وړاندې د «مهارت او مسلک» تر سرلیک لاندې کنفرانس هم د یادې ادارې لهخوا جوړ شوی و، چې په یوه برخه کې یې ځینو بنسټونو او مؤسسو له دې ادارې سره د همکاریو هوکړهلیکونه هم لاسلیک کړي وو.
په دغه تعقیبي او پیاوړتیايي کنفرانس کې تر ډېره د همکارو بنسټونو لخوا د شویو ژمنو د عملي کولو پر څرنګوالي بحث وشو، او ګډونوالو له دې ادارې سره د ګډو همکاریو پر لا پیاوړتیا ټینګار وکړ.
د نن ورځې پروګرام په پای کې یو شمېر کورنیو او نړیوالو مؤسسو، ادارو او بنسټونو ته د تخنیکي او مسلکي زدهکړو ادارې سره د دوامداره همکاریو او ارزښتناکو خدمتونو په درناوي د ستاینلیکونو او تندیسونو ډالۍ هم ورکړل شوې.
