د فاریاب د کرنې او وترنرۍ انسټیټوټ د کارمندانو او استادانو لپاره د ظرفیت لوړولو سیمینار ترسره شو
د فاریاب ولایت د تخنیکي او مسلکي زده کړو آمریت د یاد ولایت د کرنې او وترنرۍ انسټیټوټ د کارمندانو او استادانو لپاره د ظرفیت لوړولو سیمینار جوړ کړ، چې موخه یې د کاري او تدریسي چارو کیفیت ښه کول او د تعلیمي کادرونو د علمي ظرفیت لوړول دي.
په دې روزنیز پروګرام کې ګډونوالو ته د تدریس اصولو او همدارنګه د استادانو د مکلفیتونو د لایحې په شمول د بیلابیلو موضوعاتو په اړه روزنه ورکړل شوه.
په ورته وخت کې، ګډونوالو هم د ظرفیت لوړولو د داسې پروګرامونو په ترسره کولو خوښي څرګنده کړه او په راتلونکي کې یې د دوام غوښتنه وکړه.
دا په داسې حال کې ده چې د تخنیکي او مسلکي زده کړو ادارې رهبري په دوامداره توګه هڅه کوي چې د ظرفیت لوړولو پروګرامونو په لاره اچولو سره د دې ادارې د کارمندانو د پوهاوي کچه لوړه کړي.
