د پکتيا د تخنيکي زده کړو په مرکزونو کې د مجاهدينو لپاره د ادارې او مديريت د روزنې پروګرام پيل شو
د پکتیا ولایت د تخنیکي او مسلکي زده کړو په مرکزونو کې د مجاهدینو لپاره د ادارې او مدیریت د روزنې پروګرام د نوموړي ولایت د یو شمیر چارواکو په ګډون سره پیل شو.
په دې غونده کې ويناوالو د مجاهدينو لپاره د ښوونيز چاپيريال د برابرولو په برخه کې د تخنيکي او مسلکي زده کړو د ادارې د مشرتابه له هلو ځلو او پاملرنې ستاینه وکړه.
په همدې حال کې د پکتیا د علماوو شورا مرستیال مولوي حسام الدین روحاني ټینګار وکړ چې په یاد پروګرام کې ګډون کوونکي مجاهدین باید له فرصته ګټه پورته کړي او د علم په حاصلولو کې هڅې وکړي.
بل خوا د پکتيا د پوهنې رئيس مولوي عبدالوکيل خالد په دې غونډه کې وويل، چې د حکومت مشران د علومو پر زده کړې ټينګار کوي او مجاهدين هم بايد د زده کړې او علم په ترلاسه کولو کې هڅې وکړي.
د مجاهدینو د روزنیزې طرحې پر بنسټ چې د تخنیکي او مسلکي زده کړو د ادارې له خوا چمتو شوې او د ریاست الوزرا د مقام له خوا تصویب شوې ده؛ مجاهدین کولای شي په ټول هیواد کې د تخنیکي او مسلکي زده کړو په مرکزونو کې د زده کړې لپاره د تعلیمي سویې له مالومیدو وروسته شامل شي.
