د افغانستان د راتلونکي اقتصادي پرمختګ په نړیوال کنفرانس کې د مولوي غلام حیدر شهامت ګډون او وینا
د افغانستان د راتلونکي اقتصادي پراختیا په نړیوال کنفرانس کې د تخنیکي او مسلکي زده کړو ادارې سرپرست مولوي غلام حیدر شهامت ګډون او وینا وکړه.
دغه برنامه د ابن سینا د څیړنې او پراختیا مرکز لخوا جوړ شوې وه، چې په هغه کې لوړ پوړو دولتي چارواکو هم حضور درلود.
په همدې حال کې د تخنيکي او مسلکي زده کړو ادارې سرپرست د هېواد په اقتصادي وده کې د تخنيکي او مسلکي زده کړو ادارې د اهميت په اړه خبرې وکړې او ويې ويل، د بېوزلۍ له منځه وړل او د ماهر او متخصص ځواک روزل د دغې ادارې له اساسي موخو څخه دي.
نوموړي همدا راز زیاته کړه چې د اسلام سپیڅلي دین د بې وزلۍ د له منځه وړلو پر اهمیت ټینګار کړی دی.
ښاغلي مولوي شهامت زیاته کړه چې اوس مهال د افغانستان اسلامي امارت په هیواد کې له هر ډول بې وزلۍ سره مبارزه کوي.
نوموړي دغه راز په هېواد کې د امنيت ټينګښت د اقتصادي ودې لپاره يو استثنايي فرصت وباله او د ځينو لاسته راوړنو يادونه يې وکړه.
په ورته وخت کې د تخنيکي او مسلکي زده کړو ادارې سرپرست زياته کړه چې په قوش تپې کانال کې د انس جوړول، د ښوونيز نصاب معياري کول او د مجاهدينو لپاره د روزنیزې طرحې جوړول په تېر کال کې د دغې ادارې له لویو او مهمو لاسته راوړنو څخه دي.
له بلې خوا ښاغلي شهامت په بهرنیو هېوادونو کې د افغان کډوالو وضعیت ته په اشارې سره وویل «چې اوس مهال د هېواد د ځوانانو او کارپوهانو د خدمت لپاره زمینه برابره ده. هغه له ځوانانو وغوښتل چې په افغانستان کې پاتې شي او د هېواد په ابادۍ او پرمختګ کې ونډه واخلي».
