بامیان ته د تخنیکي او مسلکي زده کړو ادارې سرپرست او مرستیال سفر؛ د دغه ولایت د انسټیټونو او مسلکي ښوونځیو ستونزې وڅېړل شوې
د تخنيکي زده کړو ادارې سرپرست مولوي غلام حيدر شهامت باميانو ولايت ته د مسلکي ښوونځيو او انسټیټونو وضعیت د ارزونې په موخه سفر وکړ.
په دغه سفر کې له ښاغلي شهامت سره د تخنیکي او مسلکي زده کړو ادارې د تخنیکي او مسلکي چارو مرستیال مولوي غلام سعید احساس هم ملتیا کوله.
په هغه غونډه کې چې د باميانو ولايت تخنيکي او مسلکي زده کړو په آمریت کې جوړه شوې وه، د یاد ولايت تخنيکي آمر امين عليزاده په باميانو کې د انسټیټونو او مسلکي ښوونځيو د وضعيت په اړه خبرې وکړې او ستونزې او وړانديزونه يې ياد کړل.
ښاغلي شهامت په بامیانو کې د تخنیکي او مسلکي زده کړو د مرکزونو د کارکوونکو او استادانو ستونزې هم واوریدې او هغوی ته یې سپارښتنه وکړه چې ستونزې په قانوني او اصولي ډول حل کړي.
د تخنيکي او مسلکي زده کړو ادارې سرپرست او د دغه ادارې مرستيال هم د باميانو له والي ملا عبدالله سرحدي، د دغه ولايت له علماوو او مخورو سره وکتل او خبرې اترې یې وکړې.
ښاغلي سرحدي بامیان ولایت ته د تخنیکي او مسلکي زده کړو ادارې د مقام راتګ هرکلی وکړ او د یاد ولایت د ادارو او د مقام ترمنځ یې د بشپړې همغږۍ ډاډ ورکړ.
هغه زياته کړه، چې په باميانو کې د ادارو مسوولينو خپلې چارې له يو بل سره د صمیمیت او ورورګلوۍ په فضا کې پرمخ وړلې.
په دغه کتنه کې ښاغلي صادقي د علماوو په استازیتوب خبرې وکړې او د ښوونې او روزنې په برخه کې یې د افغانستان د اسلامي امارت له چارواکو څخه د لا زیاتې پاملرنې غوښتنه وکړه.
د غونډې په پای کې د تخنيکي او مسلکي زده کړو ادارې سرپرست خبرې وکړې او ويې ويل: «په تېرو سلو کلونو کې بهرنيانو زموږ هېواد منزوي کړی او موږ يې د پرمختګ او ټکنالوژۍ له نړيوال کاروان څخه لرې ساتلي یو».
ښاغلي شهامت زیاته کړه چې اوس د قوش تپې کانال په څېر سترې پروژې پیل شوي او هېواد د پرمختګ پر لور روان دی.
دتخنيکي اومسلکي زده کړو ادارې سرپرست ډاډ ورکړ چې دغه اداره به دمجاهدينو، د ادارو کارکوونکو او ديني مدرسو زده کوونکو ته دحرفوي زده کړو زمينه برابره کړي .
هغه زیاته کړه، چې تخنیکي او مسلکي زده کړو اداره چمتو دی چې د مسلک او حرفې په برخه کې لازم خدمتونه وړاندې کړي.
