د هیواد د ناشنوایانو لپاره د 100 ځانګړو تخصصي اشارو پیژندنه او تولید
د تخنيکي او مسلکي زده کړو ادارې د دغې ادارې د ناشنوایانو څانګې د ښوونيز نصاب د بډاينې په موخه ورکشاپ جوړ کړ، چې په یاد ورکشاپ کې استادانو، کارپوهانو او متخصصینو برخه اخيستې وه.
نوموړو په دې ورکشاپ کې، د اوریدلو معلولیت لرونکو زده کونکو لپاره د ځانګړو اشارو د پیژندلو او تولید په اړه بحث او خپل نظرونه تبادله کړل.
د تخنيکي او مسلکي زده کړو ادارې د تعليمي نصاب ریاست وايي، چې په دې ورکشاپ کې له سلو څخه زيات تخصصي اشارې د متخصصينو له خوا توليد شوي، پېژندل شوي او تاييد شوي دي.
د نصاب ریاست د مسوولینو په وینا، دغه اشارې او علامې به د نورو تخصصي اشاراتو تر څنګ د ځانګړو زده کړو د مرکزونو په نصاب کې شامل شي، چې د اورېدلو معلولیت لرونکي کسان پکې روزل کېږي.
د هغو کسانو لپاره چې د اوریدلو او لید معلولیت درلودونکي دي، روزنه او د زده کړو د زمینې چمتو کول د تخنیکي او مسلکي زده کړو ادارې له مسولیتونو څخه ګڼل کېږي.
یاده اداره اوس مهال په ټول هېواد کې د زده کړو ځانګړي مرکزونه لري او په یاد شویو مرکزونو کې د ناشنوایانو او نابیناینو« روښانزړو» کسانو لپاره د مسلکي زده کړو زمینه برابروي.
