د هلمند ولایت امینه قوماندانۍ، اداري کارکوونکو ته د ظرفیت لوړولو سیمینار وړاندې شو
د هلمند ولایت د تخنیکي او مسلکي زده کړو آمریت د هر اړخیزو همکاریو د پیاوړتیا په موخه د یاد ولایت د امنیه قوماندانۍ، اداري مدیرانو ته درې ورځنی روزنیز سیمینار جوړ کړ.
په دې روزنیز سیمینار کې د هلمند امنیه قوماندانۍ ۹۰ تنو اداري کارکوونکو ګډون درلود، چې نوموړي به ددې سیمینار په ترڅ کې د دفتر او اداري چارو د مدیریت کولو په اړه روزنه ترلاسه کړي.
د هلمند د تخنیکي او مسلکي زده کړو آمریت د مسؤلینو په وینا، د دې روزنیز سیمینار د ترسره کېدو موخه د همکاریو پیاوړتیا او په اداري چارو کې د بیلابیلو اداراتو د کارمندانو د ظرفیت لوړول دي.
دا په داسې حال کې ده چې د تخنیکي او مسلکي زده کړو ادارې رهبري تل د نورو ادارو سره د همغږیو پر پیاوړتیا ټینګار کوي او هڅه کوي ترڅو د حکومتي چارو د لا ښه والي لپاره کارمندانو ته د ظرفیت لوړولو بیلابیل پروګرامونه ترسره شي.
