د "سپینې امسا" نړیواله ورځ د تخنیکي او مسلکي زده کړو په اداره کې ونمانځل شوه
د تخنيکي او مسلکي زده کړو په اداره کې د سپنې امسا نړيواله ورځ (د نابینایانو نړيواله ورځ) ونمانځل شوه.
دغه مراسم د تخنيکي او مسلکي زده کړو ادارې سرپرست مولوي غلام حيدر شهامت او د نابينايانو د مسلکي انسټيټوټ د محصلينو او کارکوونکو په ګډون سره ونمانځل شوه.
په دغې برنامه کې د نابینایانو لپاره د هوساینې او خدماتي مؤسسې او د روښان زړو ټولنیز بنسټ مسئولینو هم حضور درلود.
د دغې برنامې په پیل کې د نابینایانو/ روښان زړو د مسلکي انسټیټوټ آمر نورمحمد فیضي خبرې وکړې او د تخنیکي او مسلکي زده کړو ادارې د مشرتابه له ملاتړ څخه یې مننه وکړه.
نورو ويناوالو هم د نابینایانو قشر پر لا زيات ملاتړ ټينګار وکړ.
د تخنيکي او مسلکي زده کړو ادارې سرپرست په دغه مراسمو کې په خپلو خبرو کې وويل، چې نابینا کسان د خداى (ج) او د اسلام د ستر پيغمبر په وړاندې ځانګړى ځاى لري.
نوموړي همدارنګه وویل چې دا مهال د حکومت یو لوړ پوړی او مهم چارواکی نابینا دی او د ا.ا.ا حکومت هم دغه قشر ته ځانګړې پاملرنه کوي.
له بلې خوا ښاغلي شهامت همدا راز زیاته کړه چې د حج او اوقافو، مخابراتو او معلوماتي ټکنالوژۍ ... وزارتونو او ښاروالي سره د هوکړه لیک په لاسلیکولو سره هڅه کوي چې د نابینایانو لپاره کار زمینه برابره کړي.
مولوي غلام حیدر شهامت د نابینایانو لپاره د بریل مطبعې/ د نابینایانو لپاره ځانګړې مطبعې د فعالولو په اړه هم خبرې وکړې او ویې ویل، د تخنیکي او مسلکي زده کړو ادارې مشرتابه هڅه کوي چې د نابینایانو مسلکي انسټیټوت محصلینو لپاره د حرفوي زده کړو په برخه کې لا زیاتې اسانتیاوې برابرې کړي.
د مراسمو په پای کې د نابینایانو د مسلکي انسټیټوټ استادانو او کارکوونکو ته تقدیرپاڼې هم ورکړل شوې.
