د خوست میخانیکي انسټیټوټ محصلینو ته په عملي بڼه روزنه ورکړل شوه
علمي سفرونه د نظري زده کړو او کاري محیط ترمنځ ارتباطي پل دی، هدارنګه دا فعالیت د تخنیکي او مسلکي زده کړو د بریالیتوب یو له اصلي ارکانو څخه هم ګڼل کیږي.
له همدې امله، د خوست میخانیکي انسټیټوټ د ساختماني څانګې محصلینو د دې ولایت د دعوت پوهنتون ته د یو علمي سفر په ترڅ کې د لیول کارۍ په اړه عملي روزنه ترلاسه کړه.
د دې علمي سفر په ترڅ کې، زده کونکو د ډله ایزو کارونو په ترسره کولو سره خپلې ګډې عملي مشاهدې یو له بل سره شریکې کړې او خپلې پوښتنې او سوالونه یې هم استاد ته وړاندې کړل.
دغه راز لارښود استاد د درس په دوام کې د لیول کارۍ په برخه کې د محصلینو پوښتنو او سوالونو ته هم ځوابونه وویل.
د تخنيکي او مسلکي زده کړو په مرکزونو کې د زده کړو لویه برخه عملي ده، له همدې امله د یادو مرکزونو فارغان په مستقیم ډول د کار بازار کې په دندو ګمارل کېږي.
دا په داسې حال کې ده چې د تخنيکي او مسلکي زده کړو ادارې مشرتابه تل د تخنيکي او مسلکي زده کړو په مرکزونو کې د عملي زده کړو پر لا پياوړتيا ټينګار کوي.
