د تخنیکي او مسلکي زده کړو ملي ادارې او مالیې وزارت د مسوولینو تر منځ غونډه ترسره شوه
د تخنیکي او مسلکي زده کړو ملي ادارې یوه پلاوي د مالیې وزارت د ګمرکونو له مسوولینو سره وکتل.
په دې کتنه کې دواړو لورو د مالیې وزارت د اړتیا وړ څانګو په اړه د بحث ترڅنګ د تخنیکي او مسلکي زده کړو په مرکزونو کې د ګمرکونو د مدیریت څانګې د رامنځته کولو په اړه هم مفصلې خبرې وکړې.
دواړو لورو خپل نظریات او لیدلوري شریک کړل او په دې برخه کې اړین او لازمي تصمیمونه هم ونیول شول.
په همدې حال کې د تخنيکي او مسلکي زده کړو ادارې د پروګرامونو د څيړنې او تضمين کيفيت رياست د دولتي او خصوصي بنسټونو له مسوولينو سره د نیازسنجۍ او د تخنيکي او مسلکي زده کړو په مرکزونو کې د روزنيزو څانګو د رامنځته کولو په اړه متعددې غونډې ترسره کړې دي.
د تخنيکي او مسلکي زده کړو ملي ادارې رهبري تل د کار بازار د اړتياوو پر بنسټ د ښوونيزو څانګو پر رامنځته کولو ټينګار کوي.
