د پلان او ستراتیژیکې همغږۍ رئیس د تخار له والي سره وکتل
د تخنیکي او مسلکي زده کړو ادارې د پلان او ستراتیژیکې همغږۍ رئیس مولوي نیک محمد نیکمل او ورسره مل پلاوي د تخار له والي مولوي ضیاء الرحمن مدني سره وکتل او خبرې اترې یې ورسره وکړې.
په دغه کتنه کې ښاغلي نیکمل د کار د بازار د ودې او د بې وزلۍ په راکمولو کې د تخنیکي او مسلکي زده کړو پر اهمیت د خبرو په ترڅ کې د تخار له والي څخه د تخنیکي او مسلکي زده کړو آمریت د ملکیتونو ستونزو د هواري په برخه کې د همکارۍ غوښتنه وکړه.
د تخار والي د یاد ولایت د تخنیکي او مسلکي زده کړو آمریت د کړنو ستاینه وکړه او له دغه آمریت سره یې د هر ډول همکارۍ ژمنه وکړه.
نوموړي د تخار د تخنيکي او مسلکي زده کړو د انسټيټيوټ د ودانۍ مسئلې ته په اشارې سره وويل، هڅه کېږي چې دغه ستونزې حل او د تخنيکي او مسلکي معياري زده کړو زمینه برابره شي.
د تخنیکي او مسلکي زده کړو ادارې د پلان او ستراتیژیکې همغږۍ رئیس د تخار د تخنیکي او مسلکي انسټیټوټ له ودانۍ څخه هم لیدنه وکړه.
