مالي او ادارې چارو مرستیال د کندز د مسلکي لېسو او انسټیټونو له استادانو او آمرینو سره وکتل
د تخنيکي او مسلکي زده کړو ادارې مالي او اداري چارو مرستيال مفتي فضل الرحمن فاضل کندوز ولايت ته د خپل سفر په ترڅ کې د یاد ولايت د تخنيکي او مسلکي زده کړو د مرکزونو له مسؤلینو او استادانو سره وکتل.
په دې کتنه کې د استادانو په استازیتوب استاد احمد ګل ذاهد خبرې وکړې او خپل وړاندیزونه او ستونزې یې د تخنیکي او مسلکي زده کړو ادارې له مالي او اداري چارو مرستیال سره شریکې کړې.
دغه راز د کندز ولايت د تخنيکي او مسلکي زده کړو آمر فريد احمد لکڼ خیل په یاد ولايت کې د مسلکي ښوونځيو او انسټیټونو د وضعیت او ستونزو په باب خبرې وکړې.
ښاغلي فاضل د کندز د تخنیکي او مسلکي زده کړو د مرکزونو د مسوولینو او استادانو ستونزې او وړاندیزونه واورېدل او د ستونزو د هواري په اړه یې ډاډ ورکړ.
