د مولوي غلام حیدر شهامت او ریاست الوزرا له یوه پلاوي ترمنځ ناسته ترسره شوه
د تخنیکي او مسلکي زده کړو ادارې سرپرست محترم مولوي غلام حیدر شهامت په خپل کاري دفتر کې د ریاست الوزرا د عمومي دفترریاست له مرستیال محترم سید احمد مستقیم سره وکتل.
په دې ناسته کې د ټولګټو وزارت مرستیال مولوي عبدالکریم فاتح، مفتي نورالله د مخابراتو وزارت حقوقي رئیس، مولوي عبدالاحمد طیب، سلطان احمد سباوون د الکترونیکي تذکرو رئیس او د احصائیې او معلوماتو ادارې د نفوسو د احوالو ثبت رئیس روح الامین هم حضور درلود.
په دې ناسته کې دواړو خواوو د دواړو بنسټونو ترمنځ د ګډو همکاريو پر څرنګوالي خبرې اترې وکړې.
د یادې غونډې په پيل کې د د ریاست الوزرا د عمومي دفتر ریاست مرستیال د اداراتو د مسوولينو ترمنځ پر همغږۍ ټينګار وکړ او زياته يې کړه، چې نوموړي باید د ستونزو د هواري په موخه له یو بل سره همغږي اوسي.
له بلې خوا د احصايې او معلوماتو ادارې مسوولينو په دې کتنه کې د تخنيکي او مسلکي زده کړو له ادارې څخه وغوښتل چې له نوموړو سره په بېلابېلو تخنيکي برخو کې همکاري وکړي.
په ورته وخت کې د تخنيکي او مسلکي زده کړو ادارې سرپرست محترم مولوي غلام حيدر شهامت د تخنیکي او مسلکي زده کړو ادارې په اړه په مختصره توګه د یادې ادارې په هکله توضیحات وړاندې کړل.
محترم مولوي شهامت د "اداراتو وسایلو د ترمیم مرکز" د جوړولو طرحې څخه چې د تخنیکي او مسلکي زده کړو ادارې لخوا جوړه شوې طرحه ده هم یادونه وکړه او ویې ویل چې په تطبیق سره به یې د اداراتو د تجهیزاتو او ډیجیټل وسایلو د ترمیم او بیارغونې زمینه مساعده شي.
دغه راز دتخنيکي او مسلکي زده کړو ادارې سرپرست ژمنه وکړه چې یاده اداره د احصايې او معلوماتو د ادارې په ګډون له ټولو اداراتو سره په تخنيکي او مسلکي برخو کې همکاریو ته چمتو ده .
د تخنيکي او مسلکي زده کړو ادارې په نننۍ غونډه کې پر يو شمېر نورو اړوندو موضوعاتو هم خبرې وشوې او غونډه په دعايې سره پای ته ورسېده.
