د تخنیکي او مسلکي زدهکړو ولایتي آمریتونو مالي مدیرانو ته روزنیز پروګرام پیل شو
د تخنیکي او مسلکي زدهکړو ادارې د کارکوونکو چارو ریاست، د مالیې وزارت د متخصصینو په همکارۍ، د تخنیکي او مسلکي زدهکړو د ۳۴ ولایتونو د آمریتونو د مالي مدیرانو لپاره پنځه ورځنی د ظرفیت لوړونې روزنیز پروګرام پیل کړ.
د دې پروګرام موخه د مالي مدیرانو د مسلکي ظرفیت لوړونې، د کاري مهارتونو پیاوړتیا او د مالي چارو د اغېزمن ترسره کولو لپاره د هغوی د وړتیاوو لوړول بلل شوې ده.
د دغه روزنیز پروګرام د پرانیستې په مراسمو کې د تخنیکي او مسلکي زدهکړو ادارې د مالي او اداري چارو مرستیال، مفتي فضلالرحمن فاضل، د اداري او مالي چارو د بهیرونو د ښه والي لپاره د مالي کارکوونکو د ظرفیت لوړولو پر اهمیت ټینګار وکړ.
د مالي او اداري چارو مرستیال وویل، د مالي کارکوونکو د مسلکي پوهې او مهارتونو پیاوړتیا د مالي او اداري بهیرونو په ښه والي او د اړوندو چارو په اغېزمن ترسره کولو کې مهم رول لري.
نوموړي زیاته کړه، تمه ده چې ګډونوال په دې پروګرام کې له وړاندې شویو مطالبو او تجربو څخه په خپلو ورځنیو دندو او مسئولیتونو کې په اغېزمنه توګه ګټه واخلي.
ګډونوالو د دې روزنیز پروګرام له جوړېدو څخه هرکلی او مننه وکړه او ویې ویل چې د ظرفیت لوړونې د ورته پروګرامونو جوړول د چارو په ښه والي کې مهم او اغېزناک دي.
