د تخنیکي او مسلکي زده کړو ادارې د سویل ختیځ زون رئیس معرفي شو
ښاغلی احمد خان صابري د یو لړ مراسمو په ترڅ کې د امارتي چارواکو او مقاماتو له لوري د تخنیکي او مسلکي زده کړو ادارې د سویل ختیځ زون د رئیس په توګه معرفي شو او خپله دنده یې پیل کړه.
د زون رئیس په توګه د محترم احمد خان صابري پیژندنې په مراسمو کې، د تخنیکي او مسلکي زده کړو ادارې د مالي او اداري چارو مرستیال، ښاغلي مفتي فضل الرحمن فاضل وویل چې د تخنیکي او مسلکي زده کړو د بیلابیلو زونونو جوړیدل د دې ادارې یوه لویه لاسته راوړنه ده.
نوموړي څرګنده کړه چې دا ریاستونه د اسلامي امارت د مشرتابه لخوا د لزومدید او اړتیاوو پر بنسټ او د تخنیکي او مسلکي زده کړو د پیاوړتیا او پراختیا په موخه جوړ او منظور شوي دي.
په ورته وخت کې، محترم احمد خان صابري هم په دې مراسمو کې د وینا پر مهال ژمنه وکړه چې په بشپړ اخلاص، مسؤلیتپالنې او مسلکي روحیې سره، د تخنیکي او مسلکي زده کړو د ودې او پرمختګ لپاره نه ستړې کېدونکې هڅې وکړي.
دا په داسې حال کې ده چې د تخنیکي او مسلکي زده کړو ادارې د رهبرۍ د زیارونو او هڅو په پایله کې، د تخنیکي او مسلکي زده کړو اته زونونه جوړ شوي دي، چې یو شمېرو یې خپل کارونه پیل کړي دي.
