د مولوي غلام سعید احساس او د فراه ولایت د تخنیکي و مسلکي زده کړو مرکزونو مسوولینو تر منځ ناسته تر سره شوه
د تخنیکي او مسلکي زده کړو ادارې پلاوي د فراه ولایت د تخنیکي او مسلکي زده کړو مرکزونو څخه د څارنې په پای کې د یاد ولایت د تخنیکي او مسلکي زده کړو د مرکزونو له مسوولینو او کارکوونکو سره ناسته ترسره کړه.
په دې ناسته کې د تخنیکي او مسلکي زده کړو مرکزونو پر ستونزو او د اړتیاوو د حل پر څرنګوالي خبرې وشوې.
په دې کتنه کې محترم مولوي احساس وویل، چې تخنیکي او مسلکي زده کړې د یو هېواد بنسټ دی او د یادو زده کړو د پراختیا په برخه کې باید له ټول توان څخه کار واخیستل شي نوموړي همدارنګه ټینګار وکړ چې ټولې چارې باید د اسلام مبارک دین د اصولو سره سم تر سره شي.
نوموړي دغه راز د تخنیکي او مسلکي زده کړو مرکزونو د مسؤلینو د وړاندیزونو او ستونزو د حل د ژمنې ترڅنګ د ځینو مسایلو په اړه هغوی ته لازمې هدایات هم ورکړل.
همدارنګه یاد پلاوي دغونډې ګډونوالو ته د چارو د ښه والي په موخه سیمینار هم وړاندې کړ.
د يادونې وړ ده، چې د تخنيکي او مسلکي زده کړو ادارې پلاوي تر دې وړاندې د فراه ولايت د مرکز، شیبکوه، او د لاشجوین ولسوالیو د تخنيکي او مسلکي زده کړو مرکزونو له وضعیت څخه څارنه ترسره کړې ده.
په ورته وخت کې محترم مولوي غلام سعید احساس د فراه ولایت د تخنیکي او مسلکي زده کړو مرکزونو مسوولین د نوموړو د ارزښتناکو خدمتونو له امله د ستاینلیکونو او نقدي ډالیو په ورکولو سره وستایل.
