د تخنيکي او مسلکي چارو مرستيال د پکتيکا له والي سره خبرې اترې وکړې
د تخنیکي او مسلکي چارو مرستیال مولوي غلام سعید احساس چې پکتیکا ولایت ته د تخنیکي او مسلکي زده کړو د مرکزونو د وضعیت د څیړلو په موخه تللی دی، د یاد ولایت له والي الحاج مولوي فیض الله جمال حقاني سره وکتل.
په دغې کتنه کې ښاغلي احساس د تخنیکي او مسلکي زده کړو ادارې د فعالیتونو او لاسته راوړنو په اړه خبرې وکړې.
نوموړي وویل چې د تخنیکي او مسلکي زده کړو ادارې د اسلامي امارت د مجاهدینو د روزنې لپاره طرحه جوړه کړی ده.
د پکتیکا والي د مجاهدینو لپاره د زده کړو زمینې برابرول خورا مهم وګڼل او ویې ویل چې د تخنیکي او مسلکي زده کړو ادارې طرحه د اسلامي امارت لپاره لویه لاسته راوړنه ده.
نوموړي زیاته کړه: «موږ په پکتیکا ولایت کې ډېر مجاهدین لرو چې د تخنیکي او مسلکي زده کړو په برخه کې لېوالتیا لري».
باید وویل شي، چې ښاغلي احساس پکتیکا ولایت ته د خپل سفر په ترڅ کې په یاد ولایت کې د تخنیکي او مسلکي زده کړو د مرکزونو وضعیت څیړلی دی.
نوموړي دغه راز د پکتیکا ولایت د علماو شورا له رئیس شیخ عبدالقدوس اعظمي او د شهیدانو او معلولینو له رئیس مولوي برادر سره هم وکتل.
ښاغلي احساس د یاد ولایت د تخنیکي او مسلکي زده کړو له آمریت سره د پکتیکا د علماوو شورا د همکارۍ غوښتنه وکړه.
د پکتيکا د علماوو شورا رئيس تخنيکي او مسلکي زده کړې مهمې وبللې او ويې ويل، چې د يوه هېواد اقتصاد د فن او مسلک په پرمختګ پورې تړلی دی.
