د تخنیکي او مسلکي زده کړو ادارې د مشرتابه پلاوي غونډه ترسره شوه
د تخنيکي او مسلکي زده کړو ادارې د مشرتابه پلاوي غونډه د یادې ادارې د مالي او اداري چارو مرستيال مفتي فضل الرحمن فاضل په حضور کې او د یادې ادارې سرپرست مولوي غلام حيدر شهامت په مشرۍ ترسره شوه.
د دې ناستې په پیل کې د مشرتابه پلاوي د تېرې غونډې پرېکړې تعقیب او اړونده ریاستونو د خپلو کړنو راپور وړاندې کړ.
په دې اړه د تخنيکي او مسلکي زده کړو ادارې سرپرست وويل، په اسلامي نظام کې د اوامرو اطاعت يو اصل دی او په اطاعت کې خير او برکت نغښتی دی. ښاغلي شهامت ټینګار وکړ چې د اوامرو اطاعت فرض دی.
دغه راز د اجنډا له مخې د تخنيکي او مسلکي زده کړو ادارې له املاکو او د وجه سردستي بودجې څخه د اغېزمنې استفادې، او همدارنګه د ولايتي ادارو د اجناسو د تثبیت په اړه بحث وشو.
د تخنيکي او مسلکي زده کړو ادارې سرپرست له بيت المال څخه په اغيزمنه استفادې د ټينګار په ترڅ کې وويل چې د یادې ادارې له املاکو او ودانۍ څخه بايد د اړتيا او اغيزمنتوب له مخې استفاده وشي.
ښاغلي شهامت همدا راز ټینګار وکړ، چې د ولایتي آمریتونو اجناس او تجهیزات باید د آمرینو له خوا مشخص او د هغه اسناد باید ترتیب شي.
