په نیمروز ولایت کې د مجاهدینو لپاره د تعلیمي دورې پیل
د نیمروز ولایت د تخنیکي او مسلکي زده کړو آمریت چارواکي په دغه ولایت کې د مجاهدینو لپاره د لومړنۍ تعلیمي دورې د پیل خبر ورکوي.
د نوموړو په وینا، دغه پروګرام د یاد ولایت د ادارې او حسابدارۍ په انسټيټوټ کې پیل شوی او د پرانیستې په مراسمو کې د سیمې یو شمېر چارواکو او مشرانو هم حضور درلود.
په ورته وخت کې د نیمروز ولایت د ادارې او حسابدارۍ د انسټيټوټ آمر ښاغلی محمد رسول مستعد وویل چې ۱۳۰ تنه د انسټيټوت په دوره او ۷۰ تنه نور د لیسې په دوره کې د تخنیکي او مسلکي زده کړو په مرکزونو کې شامل شوي دي. او دوی ته د ادارې او مدیریت پروګرام تدریس کیږي.
نوموړي په دغه پروګرام کې له ګډون کوونکو مجاهدینو څخه وغوښتل چې د اصولو او قوانینو په رڼا کې په ټولګي کې حضور ولري او د رامنځته شوي فرصت څخه زیاته ګټه پورته کړي.
دا پروګرام په داسې حال کې په نیمروز ولایت کې پیل شوی چې د تخنیکي او مسلکي زده کړو په ګڼو مرکزونو کې د مجاهدینو لپاره د ادارې او مدیریت د روزنې لړۍ دوام لري.
