مالي او ادارې چارو مرستیال د اوبو او انرژۍ وزارت مسئولینو سره د جذبي اوبو د څاګانو کیندلو په هکله خبرې اترې وکړې
د تخنیکي او مسلکي زده کړو ادارې مالي او اداري چارو مرستیال مفتي فضل الرحمن فاضل د اوبو د مدیریت د طرحې او د تخنیکي او مسلکي زده کړو په مرکزونو کې د جذبي څاګانو کیندلو په اړه د انرژۍ او اوبو وزارت له مسئولینو سره خبرې اترې وکړې.
دغه ناسته کې چې په همدې موخه جوړه شوې وه، د کابل د دریایې حوزې عمومي رئيس انجنير حبيب الرحمن حقپال وويل، د اوبو او انرژۍ وزارت پلان لري چې د اوبو د ضایع کیدو د مخنیوي په موخه د ادارو په انګړونو کې د اوبو د جذب څاګانې وکیندې.
ښاغلي حقپال د دغه پلان په تطبیق کې د تخنیکي او مسلکي زده کړو له ریاست څخه د همکارۍ غوښتنه وکړه.
مفتي فضل الرحمن فاضل د ياد شوي طرحې هرکلى وکړ او دا يې يو ښه اقدام وباله.
ښاغلي فاضل څرګنده کړه چې دا مهال په کابل کې د تخنیکي او مسلکي زده کړو یو شمېر انسټيټونه د اوبو له کمښت سره مخ دي او په دغو مرکزونو کې د اوبو کچه هم ټیټه شوې ده.
نوموړي د جذبي څاګانو د کیندلو په برخه کې د همکارۍ ډاډ ورکړ او په ورته وخت کې یې د تخنیکي او مسلکي زده کړو په مرکزونو کې د اوبو د کمښت په حل کې د اوبو او انرژۍ وزارت د همکارۍ غوښتنه وکړه.
د کابل د دریایې حوزې عمومي رئیس وويل، چې د اوبو او انرژۍ وزارت به د اوبو څاګانو د کيندلو په برخه کې د تخنيکي او مسلکي زده کړو له ادارې سره همکاري وکړي.
په پاى کې پرېکړه وشوه چې تخنيکي ټيمونه به د اوبو او انرژۍ وزارت او د تخنيکي او مسلکي زده کړو د ادارې ترمنځ د همکاريو د هوکړه ليک د ترتیب په برخه کې کار کوي.
