د پروان ولایت تخنيکي انسټیټوټ د فراغت مراسم ترسره شول
د پروان ولایت مرکز د تخنیکي انسټیټوټ د فراغت مراسم د یاد ولایت یو شمېر سیمه ییزو چارواکو، مشرانو او ځوانانو په حضور کې ترسره شول.
دغه محصلین چې شمېر يې نږدې اويا تنه دي، د برښنا او موټرونو ترميم له څانګو څخه فارغ شول.
په ورته وخت کې د پروان ولايت تخنيکي آمر مولوي محمدزي رسولي محصلينو ته د فراغت مبارکي وويله او له سيمه ييزو مقاماتو څخه يې وغوښتل چې فارغانو لپاره د کار زمينه برابره کړي.
د دغې مراسمو نورو ويناوالو هم په هېواد کې د تخنيکي او مسلکي زده کړو پر اهميت ټينګار وکړ او زياته يې کړه، چې دغه زده کړې د ټولنې اقتصادي ودې لامل کېږي.
غونډه فارغانو ته د تصدیق پاڼو په ورکولو سره پای ته ورسیده.
