د میدان وردک د مجاهدینو لپاره د ادارې او مدیریت روزنېز پروګرام د تخنیکي زده کړو په مرکزونو کې پیل شو
د میدان وردګو ولایت د سیمه ییزو چارواکو، علماوو او یو شمېر مشرانو په ګډون د مجاهدینو لپاره د ادارې او مدیریت د روزنې پروګرام د یو لړ مراسمو په ترڅ کې پیل شو.
د دغه پروګرام د افتتاحیې په مراسمو کې ویناوالو د مجاهدینو لپاره د زده کړې د زمینې د برابرولو په برخه کې د تخنیکي او مسلکي زده کړو د ادارې د رهبرۍ له هلو ځلو څخه ستاینه وکړه.
نوموړو وویل چې د مجاهدینو روزنیز پروګرام یو له هغو استثنايي فرصتونو څخه دی چې دوی ته یې په ټول هیواد کې د زده کړو د دوام زمینه برابره کړې ده.
د مجاهدینو د روزنیز طرحې پر بنسټ چې د تخنیکي او مسلکي زده کړو د ادارې لخوا چمتو شوې او د ریاست الوزرا د مقام لخوا منظور شوی؛ مجاهدین کولای شي د تعلیمي سویې د معلومیدو وروسته په ټول هیواد کې د تخنیکي او مسلکي زده کړو په مرکزونو کې شامل شي.
