د سرپل د تخنيکي او مسلکي زده کړو په آمریت کې د مجاهدینو تعلیمي پروګرام پیل شو
په سرپل کې د مجاهدینو لپاره د ادارې او مدیریت روزنیز پروګرام د یاد ولایت د والي، د اطلاعاتو کلتور ریس، د ولسي شورا مشر او نورو مشرانو په ګډون پیل شو.
د دغه پروګرام په افتتاحیه مراسمو کې د سرپل والي ښاغلي محمد یعقوب «عبالرحمن اکه» د تخنیکي او مسلکي زده کړو د ادارې له مشرتابه څخه د یاد پروګرام په لاره اچولو له امله مننه وکړه.
هغه څرګنده کړه چې مجاهدین باید له اصولو سره سم په ټولګيو کې حضور ولري او له دې فرصت څخه اعظمي ګټه پورته کړي.
په یادې غونده کې نورو ویناوالو هم د علم او زده کړې پر اهمیت ټینګار وکړ. په همدې حال کې د سرپل تخنيکي آمر زیاته کړه چې د مجاهدینو روزنه د تخنیکي او مسلکي زده کړو د ادارې له مهمو پروګرامونو څخه ده.
د سرپل ولایت تخنيکي آمر مولوي محمد یاسین فیضي وویل چې د مجاهدینو د روزنې طرحه چې د تخنیکي او مسلکي زده کړو د ادارې له خوا جوړه طرحه ده، په ټول هیواد کې د مجاهدینو لپاره د زده کړو زمینه برابره کړې ده.
