د تخنیکي او مسلکي زده کړو ادارې مشرتابه پلاوي غونډه ترسره شوه
د تخنيکي او مسلکي زده کړو ادارې د مشرتابه پلاوي غونډه د دغه ادارې د سرپرست مولوي غلام حيدر شهامت په مشرۍ او د دغه ادارې د يو شمېر رئيسانو او آمرینو په حضور کې ترسره شوه.
د دغه غونډې په پيل کې په کابل ښار کې د انسټیټونو لپاره د يوه آمریت د جوړولو او د ادارې د املاکو د ثبت په ګډون د مشرتابه پلاوي د تېرې غونډې پرېکړې تعقيب شوې او د پریکړو د ترسره شویو کړنو په اړه اړونده رئيسانو راپور وړاندې کړ.
دتعلیمي او تحصیلي چارو عمومي رئیس مولوي مبشر اغا وويل، چې د کابل ښار د انسټیټونو لپاره د يوه خپلواک آمریت د جوړولو طرحه نهايي شوې ده.
دغه راز د املاکو آمر وويل، چې د ادارې د زياتو املاکو اسناد يې راټول کړي او د ثبت لپاره يې دولتي املاکو بانک ته استولي دي.
په دغه کتنه کې د معلوماتي سیستم د جوړولو په اړه بحث وشو او د معلوماتي سیسټمونو او احصایې آمر شریف احمد راسخ په دغه برخه کې خبرې وکړې.
دغه راز د اجنډا له مخې د ١٤٠٢ مالي کال لپاره د اداري وړاندیز شوی جوړښت وړاندې شو او د غونډې برخه والو په دې اړه خبرې وکړې.
د تخنيکي او مسلکي زده کړو ادارې سرپرست مولوي غلام حيدر شهامت اړوندو مسوولينو ته دنده وسپارله، چې د ادارې په وړانديز شوي جوړښټ کې شته ستونزې هوارې کړي او غونډه د دعا په ویلو سره پای ته ورسېده.
