د تخنیکي او مسلکي زده کړو ادارې او ښار جوړولو وزارت ترمنځ دوه اړخیزه ناسته ترسره شوه
د تخنیکي او مسلکي زده کړو ادارې سرپرست الحاج مولوي غلام حیدر شهامت د کور او ښار جوړونې وزیر شیخ حمدالله نعماني ترمینځ دوه اړخیزه ناسته ترسره شوه.
په دې غونډه کې، دواړو خواوو د تخنیکي او مسلکي زده کړو ادارې او کور او ښار جوړولو وزارت ترمنځ د ګډو همکاریو پر پیاوړتیا بحث وکړ.
د ناستې په پیل کې، د ښار جوړونې وزیر د یاد وزارت د اهدافو، پروګرامونو او اړتیاوو په اړه خبرې وکړې، او ویې ویل چې د کور او ښار جوړونې وزارت مسلکي او تخنیکي کسانو ته لا زیاته اړتیا لري.
نوموړي د تخنیکي او مسلکي زده کړو د ادارې له سرپرست سره خپلو خبرو په ترڅ کې زیاته کړه چې د هیواد د جوړونې، بیارغونې او پرمختګ لپاره مسلکي او متخصص اشخاصو ته اړتیا ده.
په همدې حال کې د تخنیکي او مسلکي زده کړو ادارې سرپرست مولوي غلام حیدر شهامت د ښار جوړونې وزیر سره د کتنې په ترڅ د یادې ادارې د لاسته راوړنو او پروګرامونو په اړه خبرې وکړې.
الحاج مولوي شهامت څرګنده کړه چې د ماهر او مسلکي کاري ځواک روزنه د تخنیکي او مسلکي زده کړو ادارې یو له بنسټیزو اهدافو څخه ده.
د تخنیکي او مسلکي زده کړو ادارې سرپرست په دې غونډه کې دغه راز زیاته کړه چې یاده اداره چمتو ده ترڅو د ښار جوړونې وزارت سره د مسلکي او ماهرو کسانو په شمول، په بیلابیلو برخو کې همکاري وکړي.
د یادې ناستې په ترڅ کې پر نورو اړوند مسایلو هم خبرې اترې وشوې، او دواړو خواوو د ګډو همکاریو د ښه والي او پراخولو لپاره د ګډې کاري کمیټې په جوړولو ټینګار وکړ.
