د تخنیکي او مسلکي زده کړو اداره ۱۰۰۰ تنه فارغین په دندو ګماري
د یو پروګرام په اساس چې د تخنیکي او مسلکي زده کړو ادارې له لوري جوړ شوی دی، د تخنیکي او مسلکی زده کړو مرکزونو سلګونه ممتاز فارغین په دندو ګمارل کیږي.
الحاج مولوي غلام حیدرشهامت، د تخنیکي او مسلکي زده کړو ادارې سرپرست، د حکومت د رسنیو مرکز په یوه غونډه کې د دغه پروګرام جزئیات وړاندې کړل.
نوموړي وویل چې د تخنیکي او مسلکي زده کړو مرکزونو ۱۰۰۰ تنه فارغین په تدریجي توګه د قراردادي استاذانو په توکه په ولایتونو او مرکز کې د تخنیکي او مسلکي زده کړو په مرکزونو کې ګمارل کیږي.
ښاغلي مولوي شهامت زیاته کړه چې په تخنیکي او مسلکي زده کړو مرکزونو کې ګمارل شوي استاذان له یوکال تدریس وروسته د یوې ټاکل شوې تګلارې پربنسټ، د تخنیکي او مسلکي زده کړو په اداره کې د رسمي استاذ په توګه ګمارل کیږي.
همدارنګه د تخنیکي او مسلکي زده کړو ادارې سرپرست زیاته کړه چې د دغه پروګرام اساسي موخه د متخصصو او مسلکي ځوانانو ملاتړ دی چې په تخنیکي او مسلکي زده کړو مرکزونو کې یې زده کړې ترلاسه کړې دي.
الحاج مولوي شهامت زیاته کړه چې د دغه پروګرام په پلي کولو سره د زده کړیالانو ترمنځ سالم رقابت رامنځ ته کیږي.
نوموړي د تخنیکي او مسلکي زده کړو ادارې د څانګو په هکله جزئیات وړاندې کړل، او زیاته یې کړه چې دغه اداره ۱۱ ښوونیز سکتورونه او ۷۲ څانګې لري.
د دغه پروګرام په پای کې ښاغلي مولوي غلام حیدر شهامت په دې هکله د رسنیو پوښتنو او سوالونو ته ځوابونه ورکړل.
