د « تدریس کیفیت» روزنیز ورکشاپ پای ته ورسېد
د تدریس کیفیت روزنیز ورکشاپ چې د تخنیکي او مسلکي زده کړو ادارې، د نصاب او ښوونکي روزنې د ریاست له خوا په لاره اچول شوی و پای ته ورسېد.
په دغه پروګرام کې نوي ګمارل شوي استاذان او همدارنګه د نابینایانو برخې د ۱۴ ولایتونو د انسټیټوټونو استاذانو پکې ګډون کړی و، او ۶ ورځې یې د تدریس د کیفیت په هکله زده کړې ترلاسه کړې.
د دغه ۶ ورځني ورکشاپ د پای په مراسمو کې ښاغلي باورخان صافي د « تدریس کیفیت» په ورکشاپ کې د ګډون کوونکو استاذانو په نمایندګۍ وینا وکړه، او د دغه پروګرام له جوړوونکو یې مننه وکړه.
نوموړي د استاذانو د ظرفیت په لوړولو کې د دغه ډول پروګرامونو نقش مهم وباله.
همدارنګه ښاغلي انجینر احمد نبي نایل، د نصاب او ښوونکي روزنې ریاست رئیس، د ځوانانو په روزنه کې د استاذانو رول مهم وباله او زیاته یې کړه چې په دغه پروګرام کې ګډون کوونکي استاذان باید خپلې زده کړې له نورو سره شریکې کړي.
همدارنګه، ښاغلي انجینر نایل د زده کوونکو د تدریس د څرنګوالي په هکله د « تدریس کیفیت» په ورکشاپ کې ګډون کوونکو استاذانو ته سپارښتنې وکړې، او د تصدیق پاڼو په ورکولو سره مراسم پای ته ورسېدل.
