په جوزجان ولایت کې د ځانګړو زده کړو څانګه جوړه شوه
په جوزجان ولایت کې د اوریدلو او لید معلولیت لرونکو کسانو لپاره ځانګړو زده کړو څانګه د یو لړ مراسمو په ترڅ کې جوړه شوه.
ددې مراسمو په پرانیست غونډه کې د جوزجان تخنیکي او مسلکي زده کړو آمریت د مسؤلینو سربیره، د یاد ولایت یو شمیر سیمه ایزو چارواکو هم ګډون درلود.
ګډونوالو په مراسمو کې د وینا پر مهال، د ځانګړو زده کړو څانګې له جوړیدو څخه چې د تخنیکي او مسلکي زده کړو ادارې د هڅو او هلو ځلو له لارې په دې ولایت کې جوړه شوې ده، ستاینه وکړه.
د یادونې وړ ده چې د تخنیکي او مسلکي زده کړو اداره د هیواد په ۱۶ ولایتونو کې د ځانګړو زده کړو مرکزونه لري، چې په یادو مراکزو کې د اوریدلو او لید معلولیت لرونکي کسان په مسلکي ډول روزنه ترلاسه کوي.
دا په داسې حال کې ده چې، د تخنیکي او مسلکي زده کړو ادارې رهبري تل هڅه کوي چې د ټولنې ټولو اقشارو او وګړو ته د تخنیکي زده کړو زمینه برابه کړي.
