د تخنیکي او مسلکي زده کړو ادارې او خصوصي سکتور ترمنځ د همغږۍ دویم کنفرانس جوړ شو
له خصوصي سکتور سره د تخنیکي او مسلکي زده کړو ادارې د همغږۍ او مشارکت دوهم کنفرانس په انټر کانټیننټل هوټل کې جوړ شو.
یاد پروګرام به دوه ورځې دوام وکړي او په دې پروګرام کې به ګډونوال د خصوصي سکټور سره د تخنیکي او مسلکي زده کړو ادارې د همغږۍ او مشارکت پر څرنګوالي بحث وکړي.
د یاد کنفرانس د پرانېستې په مراسمو کې یو شمېر حکومتي مقاماتو او همدارنګه د خصوصي سکټور استازو ګډون او ویناوې یې هم وکړې.
د پروګرام په پیل کې د تخنیکي او مسلکي چارو مرستیال ښاغلي مولوي غلام سعید احساس وینا وکړه او ویې ویل چې د فقر له منځه وړل او د کار بازار لپاره د مسلکي او ماهر کاري ځواک روزل د تخنیکي او مسلکي زده کړو ادارې له بنسټیزو موخو څخه دي.
نوموړي د تخنيکي او مسلکي زده کړو له ادارې سره د خصوصي سکټور د مشارکت په اړه هم توضیحات وړاندې کړل.
محترم مولوي احساس څرګنده کړه چې د تخنيکي او مسلکي زده کړو اداره چمتو ده چې د خصوصي سکټور د سفارشاتو او اړتياوو سره سم مسلکي او ماهر کسان وروزي او د نوموړو اختیار ته یې وړاندې کړي .
د غونډې په دوام کې نورو ويناوالو هم د تخنيکي او مسلکي زده کړو له ادارې سره د خصوصي سکټور د مشارک پر ارزښت ټينګار وکړ.
ويناوالو د خپلو خبرو په ترڅ کې څرګنده کړه چې د تخنيکي او مسلکي زده کړو ادارې او خصوصي سکټور ترمنځ همغږي اړینه ده او دا همغږي او مشارکت بايد لا پياوړي شي.
د یاد پروګرام په دویمه برخه کې، بیلابیل تخنیکي او مسلکي ډلو د ډله ایز کار په ترسره کولو سره هڅه کوي ترڅو د تخنیکي او مسلکي زده کړو ادارې سره د خصوصي سکتور د مشارکت پر څرنګوالي بحث او نظرونه تبادله کړي.
دغه کنفرانس به سبا سهشنبه هم دوام وکړي او د تخنیکي او مسلکي زده کړو ادارې سره د خصوصي سکتور د همغږۍ او مشارکت په اړه بحث وشي.
