په بلخ ولایت کې ۱۲۰۰ مجاهدینو ته د ادارې او مدیریت په برخه کې د زده کړو زمینه برابره شوه
د بلخ ولایت د تخنیکي او مسلکي زده کړو په مرکزونو کې د ۱۲۰۰ تنو مجاهدینو لپاره د ادارې او مدیریت روزنیز پروګرام پیل شو.
د دغه پروګرام د افتتاحې په مراسمو کې د بلخ ولایت یو شمېر سیمه ییزو چارواکو برخه اخیستې وه او وینا یې وکړې.
د دې مراسمو په پیل کې د بلخ ولایت تخنيکي آمرښاغلي نورالله صلاح الدین امیني د دغه ولایت په تخنیکي روزنیزو مرکزونو کې د مجاهدینو د روزنې څرنګوالی تشریح کړ.
هغه وویل، د مجاهدینو د روزنیزې طرحې له مخې چې د تخنیکي او مسلکي زده کړو ادارې له خوا چمتو شوې، مجاهدین کولای شي د تعلیمي سویې له تثبیت وروسته د تخنیکي او مسلکي زده کړو په مرکزونو کې شامل شي.
په ورته وخت کې د بلخ ولایت مقام مرستیال حاجي مولوي نورالهادي ابوادریس د معاصرو، دیني او حرفوي علومو په ارزښت خبرې وکړې او ویې ویل چې مجاهدین باید له رامنځته شوي فرصت څخه په استفادې د علم د حاصلولو په برخه کې کار وکړي.
د دې مراسمو په دوام کې د بلخ ولایت د علماوو شورا رئیس او د بلخ ولایت د پوهنې رئیس شیخ عبدالجلیل شهید خیل د عصري علومو په ارزښت او د مجاهدینو د مسلکي کولو په اړه خبرې وکړې.
دوی وویل چې د یوې ټولنې پرمختګ د علم په پرمختګ پورې اړه لري.
