د تخنیکي او مسلکي چارو مرستیال د غزني تخنیکي مرکزونو له آمرینو سره خبرې اترې وکړې
د تخنیکي او مسلکي زده کړو ادارې تخنیکي او مسلکي زده کړو چارو مرستیال ښاغلي مولوي غلام سعید احساس د غزني ولایت د تخنیکي او مسلکي زده کړو مرکزونو د کتنې په پای کې د یاد ولایت د تخنیکي او مسلکي زده کړو د مرکزونو له آمرینو او کارکوونکو سره وکتل او خبر اترې یې ورسره وکړې.
په دغې ناسته کې د تخنيکي او مسلکي زده کړو د مرکزونو مسئولينو خپلې ستونزې او اړتياوې د تخنيکي او مسلکي زده کړو له ادارې له پلاوي سره شريکې کړې.
په ورته وخت کې ښاغلي مولوي احساس وویل، په هېواد کې د اسلامي نظام ټینګښت د خدای له نعمتونو څخه دی او هر څوک یې باید د پرمختګ لپاره کار وکړي.
دغه راز د تخنيکي او مسلکي چارو مرستيال د يوه معياري انسټیټوټ د جوړولو يادونه وکړه او ټينګار يې وکړ چې د تخنيکي او مسلکي زده کړو مرکزونه بايد د تخنيکي او مسلکي کسانو په روزلو کې لا زيات کار وکړي.
له بلې خوا د تخنيکي او مسلکي زده کړو ادارې پلاوي د غزني ولايت د تخنيکي او مسلکي زده کړو مرکزونو آمرینو او کارکوونکو ته يو پرزنټيشن وړاندې کړ، چې موخه يې په يادو شويو مرکزونو کې د چارو ښه کول دي.
ښاغلي مولوي احساس د غزني ولایت د تخنیکي او مسلکي مرکزونو د اړتیاوو او ستونزو د حل ژمنه وکړه او مسؤلینو ته یې د ځینو مسایلو په اړه لازمې لارښوونې هم وکړې.
د تخنيکي او مسلکي زده کړو ادارې پلاوي دغه سفر له ميدان وردګو ولايت څخه پيل شو او ټاکل شوې چې نورو ولايتونو ته هم سفر وکړي.
د دغه سفر موخه د تخنیکي او مسلکي زده کړو مرکزونو د وضعیت ارزول او د هغوی د ستونزو او اړتیاوو په ګوته کول دي.
