د تخنيکي او مسلکي زده کړو ادارې د استادي بستونو الکټرونیکي آزموينه پرانیستل شوه
د تخنیکي او مسلکي زده کړو ادارې د ښوونیزو مرکزونو ۱۸۶ استادي بستونو الکټرونیکي آزموینه پرانیستل شوه.
په دغه مراسمو کې د تخنیکي او مسلکي زده کړو ادارې سرپرست مولوي غلام حیدر شهامت او د چارو ادارې د څارنې او پالیسۍ معاون مولوي سیف الدین تائب هم حضور درلود.
د تخنيکي او مسلکي زده کړو ادارې سرپرست مولوي غلام حيدر شهامت د دغې ادارې د ښوونیزو مرکزونو د استادي بستونو د الکټرونیکي آزموینې پرانیستې په مراسمو کې وويل چې د استادي بستونو لپاره روڼتيا، عدالت او تخصص ډېر مهم دى.
ښاغلي شهامت نبوي احادیثو ته په اشارې سره په ټولنه کې د معلم او استاد مقام ډېر مبارک او مهم وباله.
د مولوي شهامت په وینا، "په ټولنه کې معلم او استاد رول د بنسټ په څېر دی، که سم وي، ټولنه به پرمختګ وکړي."
په دغه مراسمو کې د چارو ادارې د څارنې او پالیسۍ معاون مولوي سیف الدین تائب هم خبرې وکړې او د الکټرونیکي آزموینو د روڼتیا په اړه یې ډاډ ورکړ.
ښاغلي تائب زیاته کړه، حکومت ژمن دی، چې د الکټرونیکي آزموینې په ترسره کولو سره کار اهل کار ته وسپاري. د هغه په وينا، کار اهل کار ته سپارلو سره به په ټولنه او حکومتوالۍ کې پرمختګ منځته راځي.
د تخنيکي او مسلکي زده کړو ادارې د ښوونيزو مرکزونو د استادي بستونو په ډله ييزه آزموينه کې د ګډون کوونکو شمېر ۱۸۱۸ تنه وو.
