د تخنیکي او مسلکي زده کړو ادارې د پلان او ستراتیژیکو همغږۍ د رئیس د یونسکو له پلاوي سره وکتل
د ملګرو ملتونو د علمي، ښوونیز او فرهنګي سازمان (یونسکو) یوه پلاوي د تخنیکي او مسلکي زده کړو ادارې د پلان او ستراتیژیکو همغږۍ له رئیس ښاغلي مولوي نیک محمد نیکمل سره وکتل او خبرې اترې یې وکړی.
په دغه کتنه کې د یونسکو پلاوي د دغه سازمان د تخنیکي او مسلکي زده کړو له ادارې سره د همکارۍ پر څرنګوالي خبرې وکړې.
د دغه پلاوي غړو وويل، چې يونسکو د تخنيکي او مسلکي زده کړو د عمومي وضعيت د څيړنې، د احصائيې او معلوماتي ټکنالوجۍ د برخې کارکوونکو د ظرفيت د لوړولو او د ښوونځيو د ښه والي پلان د بيا کتنې په برخو کې همکاري کوي.
ښاغلي نیکمل د یونسکو د همکاریو قدرداني وکړه او د تخنیکي او مسلکي زده کړو له ادارې سره یې د دغه سازمان پر همغږي ټینګار وکړ.
