ښاغلي مولوي صاحب شهامت د تخنیکي زده کړو په مرکزونو کې په عملي زده کړو ټینګار وکړ
الحاج مولوي غلام حیدر شهامت، د تخنیکي او مسلکي زده کړو ادارې سرپرست، د فراه ولایت د تخنیکي او مسلکي زده کړو په مرکزونو کې په عملي زده کړو ټینګار وکړ.
نوموړي د فراه ولایت د تخنیکي او مسلکي زده کړو مرکزونو د څېړلو په بهیر کې د دغه ولایت د مرکز له تخنیکي انستیتوت څخه لیدنه وکړه.
ښاغلي مولوي شهامت د زده کړیالانو اړتیاوې او ستونزې واورېدې، او ستونزو د حل کولو په برخه کې یې د همکاری وعده ورکړه.
له بل پلوه، د تخنیکي او مسلکي زده کړو ادارې د مشرتابه پلاوي له لوري د دغه مرکز ټول اسناد وکتل شول، او د چارو د سمون په موخه یې هغوی ته اړینې لارښوونې وکړې.
د تخنیکي او مسلکي زده کړو ادارې سرپرست، د تخنیکي انستیتوت له زده کړیالانو سره د لیدنې په وخت کې وعده وکړه چې د زه کړیالانو لپاره لیلیه جوړیږي، زیاته یې کړه چې د زده کړې دوه مرکزونه د ښار مرکز ته انتقالیږي.
په همدې حال، ښاغلي مولوي شهامت د عملي زده کړو په موخه ورکشاپونو ته د نورو وسایلو، تجهیزاتو او روزنېزو موادو د برابرولو وعده ورکړه.
الحاج مولوي شهامت د هېواد په پرمختګ کې د تخنیکي او مسلکي زده کړو ارزښت مهم وباله او مسؤلینو ته یې لارښونه وکړه چې د زده کړیالانو ستونزو او اړیتاو ته رسیدګي وکړي.
