په دایکندي ولایت کې د محبوسینو لپاره د تخنیکي زده کړو د زمینې برابرول
د دایکندي ولایت اړوند د تخنیکي او مسلکي زده کړو آمریت مسولین د یاد ولایت محبوسینو لپاره د مبائیل ترمیم لنډ مهاله روزنیز پروګرام په لاره اچولو خبر ورکوي.
د یاد پروګرام د ترسره کولو موخه له بند څخه وروسته د محبوسینو لپاره د کار زمینې برابرول او د نوموړو د اقتصادي وضعیت وده ویل شوې ده.
دغه پروګرام د دایکندي ولایت په مرکزي محبس کې د تخنیکي او مسلکي زده کړو ادارې د له خوا جوړ شوی، چې ددې پروګرام په ترڅ کې به ۳۰ تنه محبوسین د دریو میاشتو په ترڅ کې په عملي او نظري بڼه روزنه ترلاسه کړي.
دا په داسې حال کې ده چې د تخنيکي او مسلکي زده کړو ادارې رهبري تل هڅه کوي چې د تخنيکي او مسلکي زده کړو په برخه کې د زده کړو د زمینې په برابرولو سره د هېواد ځوانان له بېکارۍ څخه مسلک ته راوګرځوي.
