په بادغیس ولایت کې د تخنيکي زده کړو په مرکزونو کې د شاملولو په موخه د مجاهدينو د تعلیمي سویې د تثبیت آزموينه واخیستل شوه
په بادغیس ولایت کې یاد ولایت د تخنیکي او مسلکي زده کړو په مرکزونو کې د ادارې او مدیریت په پروګرام کې د شاملیدو او زده کړې په موخه له څه باندې ۲۵۰ تنو مجاهدینو څخه د تعلیمي سویې د تثبیت آزموینه واخیستل شوه.
دغه پروګرام چې د بادغیس ولایت د سیمه ییزو ادارو د استازو په حضور کې ترسره شو، د بادغیس ولایت د تخنیکي زده کړو آمریت مسوولینو د تخنیکي زده کړو په مرکزونو کې د مجاهدینو د شاملولو په پروسه کې د شفافیت ډاډ ورکړ.
د هغې طرحې پر بنسټ چې د تخنيکي او مسلکي زده کړو د ادارې له خوا په هیواد کې په لاره اچول شوې ده، مجاهدين به د تخنيکي او مسلکي زده کړو په مرکزونو کې د تعلیمي سویې د تثبیتیدو وروسته د اداري او مديريت په برخه کې د زده کړو د دوام په موخه شامل شي .
دا په داسې حال کې ده چې دغه پروګرام د ګڼو ولایتونو په تخنیکي او مسلکي زده کړو مرکزونو کې دوام لري.
