مولوي غلام حیدر شهامت د موبي ګروپ له یوه پلاوي سره وکتل
د تخنيکي او مسلکي زده کړو ادارې سرپرست ښاغلي مولوي غلام حيدر شهامت د موبي ګروپ له يوه پلاوي سره وکتل او خبرې اترې یې ورسره وکړې.
د طلوع ټلویزیون مشر ذبیح الله سادات چې د نوموړي پلاوي سره مل وو؛ دوی د تخنیکي او مسلکي زده کړو ادارې او د «موبي ګروپ» ترمنځ د همکاریو پر څرنګوالي خبرې وکړې.
د طلوع نيوز تلویزیون مشر د تخنيکي او مسلکي زده کړو ادارې سرپرست سره په خبرو کې د موبي ګروپ په څانګو کې د دغې ادارې د ښوونيزو مرکزونو د فارغانو د جذب يادونه وکړه.
له بلې خوا ښاغلي مولوي شهامت د افغانستان په مثبت پرمختګ کې د ملي رسنیو رول مهم وباله او ویې ویل، چې حکومت په هېواد کې د ځوانانو، مسلکي کسانو، ژمن او متخصصینو ملاتړ کوي.
د موبي ګروپ مسئولینو او د تخنیکي او مسلکي زده کړو ادارې د همکاریو د هوکړه لیک په لاسلیکولو سره د ګډې همکارۍ د پیلولو هوکړه وکړه.
