د هلمند ولایت مرکز میخانیکي عالي لېسې زده کوونکي د سولر سیسټم له درې میاشتني پروګرام څخه فارغ شول
د سولر سیسټم په برخه کې لنډمهاله مسلکي روزنیز پروګرام، چې مخکې د هلمند ولایت تخنیکي او مسلکي زده کړو آمریت لخوا د دغه ولایت په میخانیکي عالي لېسې کې پیل شوی و، پای ته ورسید.
په دې لنډمهاله مسلکي پروګرام کې، زده کوونکو د تېرو دریو میاشتو په ترڅ کې د کور سولر سیسټمونو نصبول، تنظیمول او فعالول، د سولري ای سي / ډي سي انرژۍ په مرسته د اوبو پمپونو چلول، د سیسټم خوندیتوب، میټر کولو او د تخنیکي ستونزو تشخیص کولو مهارتونه په عملي ډول زده کړل.
د دې پروګرام پای مراسمو کې، د هلمند ولایتي مسؤلينو د ځوانانو لپاره د لنډمهاله روزنیزو پروګرامونو په چمتو کولو کې د تخنیکي او مسلکي زده کړو ادارې د هڅو ستاینه وکړه او ټینګار یې وکړ چې دا ډول پروګرامونه له ځوانانو سره په کارموندنه او ځان بسیاینې کې مرسته کوي.
په ورته وخت کې، فارغانو د لنډمهاله روزنیزو پروګرامونو څخه خپل رضایت څرګند کړ او ویې ویل چې دا ډول پروګرامونه دوی سره په ټولنه کې د بیا مدغم کېدو او د دوی په راتلونکي کې د مثبت بدلون په رامینځته کولو کې اغیزمن رول لوبوي. د یادونې وړ ده چې د دې پروګرام په پای کې، له دغه روزنیز پروګرام څخه فارغانو ته ستاینلیکونه هم ورکړل شول.
