د لوړو زده کړو وزارت د انسټیټونو د فارغانو لپاره د یوکلن تنزیل د لرې کولو په اړه د پرېکړې د تطبیق پیل
د لوړو زده کړو وزارت د رهبري شورا د پرېکړې له مخې، په دولتي پوهنتونونو کې د تخنيکي او مسلکي زده کړو ادراې د انسټیټونو د فارغانو لپاره د يو کلن تنزیل د لرې کولو د پرېکړې عملي کول به په ۱۴۰۲ کال د پسرلي له سمسټر څخه پيل شي. او همدارنګه د روان تعلیمي کال د مني سمسټر څخه په خصوصي پوهنتونونو کې د پلي کیدو وړ دي.
د تخنیکي او مسلکي زده کړو ادراې او د لوړو زده کړو وزارت ترمنځ د هوکړه لیک له مخې به په دولتي او خصوصي پوهنتونونو کې د زده کړو د دوام لپاره د انسټیټونو د فارغانو لپاره یو کلن تنزیل لرې شي.
په تیر کې د انسټیټونو د څوارلسم ټولګي فارغان د کانکور د ځانګړو ازموینو له اخیستو وروسته په پوهنتون کې د بیا ځل لپاره څوارلسم ټولګی لوسته. خو د تخنيکي او مسلکي زده کړو ادارې او د لوړو زده کړو وزارت د هوکړې له مخې به له دې وروسته د انسټیټونو فارغان د پوهنتون په پنځلسم ټولګي کې شامل شي.
د دغه هوکړه لیک له مخې د کانکور په اختصاصي ازموینه کې د انسټیټونو د فارغانو لپاره د کامیابی نمبرو سلنه له ۸۰ سلنې څخه ۷۵ سلنې ته را ټیټه شوې ده.
همدارنګه د تخنيکي او مسلکي زده کړو له مضامینو څخه به د کانکور اختصاصي ازموينې پوښتنې طرحه شي.
