د "حسان" ادبي بهیر د ترنم او فرهنگ ریاست له خوا پرانیستل شو
د "حسان" ادبي بهیر د یو لړ مراسمو په ترڅ کې د تخنیکي او مسلکي زده کړو ادارې د ترنم او فرهنګ ریاست کې د یو شمېر مسوولینو، پوهانو او شاعرانو په ګډون پرانیستل شو.
د یاد ادبي بهیر د پرانیستلو موخه په هېواد کې د ترنم ویلو د فرهنګ ملاتړ او پیاوړتیا ده.
د تخنیکي او مسلکي زده کړو ادارې د ترنم او فرهنګ رياست مسوولين وايي، چې د دې ادبي بهیر په پرانيستلو سره دغه رياست هڅه کوي، ترڅو د ترنم ويلو او شعرونو فرهنګ اصولمند کړي.
په دوام کې ويناوالو د "حسان" ادبي بهير د پرانيستې په مراسمو کې د ترنم او فرهنګ رياست له ليکوالانو او شاعرانو د ملاتړ له امله د قدردانۍ ترڅنګ په هېواد کې اسلامي ادبياتو ته د لا زياتې پاملرنې غوښتنه وکړه.
په ورته وخت کې ښاغلي استاد عبدالهادي مجاهد د "حسان" ادبي بهیر د پرانیستې په مراسمو کې د وینا پر مهال وویل، چې په هېواد کې اسلامي ادب او فرهنګ زیات کار ته اړتیا لري او په دې برخه کې باید زیاتې هڅې وشي.
په همدې حال کې د تخنیکي او مسلکي زده کړو ادارې دتخنيکي او مسلکي چارو مرستيال محترم مولوي غلام سعيد احساس وويل چې یاده اداره د فرهنګيانو او شاعرانو پشتیبانۍ او ملاتړ ته ژمن دى.
نورو ويناوالو هم د اسلامي ادبياتو په پياوړتيا او ملاتړ ټينګار وکړ.
